កាន់តំណែងបានជិត ២ ខែ លោកជំទាវអ្នកឧកញ៉ា ម៉ៅ ចំណាន ប្រើភាពឆ្លាតវៃធ្វើឱ្យសមាគមសិល្បករខ្មែរផ្លាស់ប្តូរយ៉ាងឆាប់រហ័ស

គិតមកដល់ពេលនេះ រយៈពេលជិត ២ ខែហើយ ដែលលោកជំទាវអ្នកឧកញ៉ា ម៉ៅ ចំណាន ត្រូវបានជ្រើសតាំងដោយការបោះឆ្នោតពីសិល្បករខ្មែរក្លាយជាប្រធានសមាគមសិល្បករខ្មែរថ្មី អាណត្តិទី ៦ កាលពីថ្ងៃទី ០២ ខែឧសភា ឆ្នាំ ២០២៤ កន្លងទៅ។

ពិតណាស់ ក្រោយពីបានជាប់ឆ្នោតក្លាយជាប្រធានសមាគមសិល្បករខ្មែរអាណត្តិថ្មីនេះ លោកជំទាវអ្នកឧកញ៉ា ម៉ៅ ចំណាន បានបំពេញតួនាទីយ៉ាងយកចិត្តទុកដាក់បំផុតចំណាយទាំងកម្លាំងកាយ កម្លាំងចិត្ត បំផុសគំនិតថ្មីៗក្នុងការចូលរួមជួយលើកតម្កើនដល់វិស័យសិល្បៈខ្មែរតាមរយៈសកម្មភាពផ្សេងៗ។

ជាក់ស្ដែង មួយរយៈកន្លងទៅនេះ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ក៏តែងបើកអង្គប្រជុំបន្តបន្ទាប់ជួបជុំសិល្បករ-ការិនី ដែលមានបទពិសោធក្នុងវិស័យសិល្បៈច្រើនឆ្នាំ ដើម្បីរួមមតិគ្នាក្នុងការរៀបចំសមាគមកាន់តែល្អប្រសើរឡើង។

លើសពីនេះ ក្នុងឱកាសជួបសំណេះសំណាលសិល្បករ-ការិនី នៃកម្មវិធី «អ្នកស្នងមរតក» កាលពីពេលថ្មីៗកន្លងទៅ លោកជំទាវអ្នកឧកញ៉ា ម៉ៅ ចំណាន ក៏បានដាក់ចេញនូវផែនការសកម្មភាព ៥ ចំណុចសំខាន់ៗសម្រាប់សមាគមអាណត្តិទី ៦ នេះ ដើម្បីអភិរក្ស អភិវឌ្ឍន៍ និង លើកស្ទួយវប្បធម៌សិល្បៈជាតិខ្មែរ ក៏ដូចជាលើកកម្ពស់កិត្យានុភាពសិល្បៈវប្បធម៌ជាតិទៀតផង។

តាមរយៈការកាន់តំណែងរយៈពេលជិត ២ ខែនេះ លោកជំទាវអ្នកឧកញ៉ា ម៉ៅ ចំណាន កាន់តែទទួលបានការស្រឡាញ់ពេញចិត្តយ៉ាងខ្លាំងពីសំណាក់មហាជនអ្នកគាំទ្រវិស័យសិល្បៈ ក៏ដូចជាសិល្បករ-ការិនីជាច្រើន បានបង្ហាញនូវការគោរពស្រឡាញ់ និង ស្ងើចសរសើរចំពោះការបំពេញតួនាទីដ៏សកម្មរបស់ប្រធានសមាគមសិល្បករខ្មែររូបនេះ ដែលបានធ្វើឱ្យសមាគមកាន់តែល្អខ្លាំងថែមទៀត៕